Ҳамма касбнинг ўзига яраша қийинчиликлари бор. Лекин ишнинг кўзини билган одам ҳар қандай қийинчиликни ҳам уддалайди. Болалар тарбиячиси бўлиш, уларга кун давомида жавобгарликни ўз зиммасига олиш ҳамма инсоннинг ҳам қўлидан келавермайдиган иш. Фақатгина болаларни сева оладиган, улар билан болаларча гаплашадиган, ҳар қандай шароитда ҳам болаларнинг кўнгилларига йўл топа оладиган инсонларнинг юмушларидир бу.

      Дилфуза Равшанова ҳам шундай машаққатни бўйнига олган фидойилардан. Дилфуза опа 1974 йил Бухоро вилояти Шофиркон туманида таваллуд топган. Тумандаги 14-сонли ДМТТда кўп йиллардан бери фаолият олиб бормоқда. Ҳаётда касбидан барака топиб, жамоадошлари меҳрини козониб, 22 йилдан буён болаларга таълим-тарбия бериб келаётган, кўплаб тарбиячиларнинг устози, Дилфуза опанинг бағри доим болажонлар билан тўла.

     -Ҳар тонг иш фаолиятим бошланар экан, беғубор митти юраклар билан самимий мулоқот олиб бораман, уларнинг болаларча “катта” гапиришлари, атрофдаги ҳолатга ўз фикрларини эркин баён этишларини тинглаб, бугун болажонлар анчагина тез ривожланаётганлигини, дунёқараши 15 йил олдинги тенгқурларидан илдамлаганлигини сезаман, – дейди Дилфуза опа суҳбат давомида. Бугун болаларга боладек эмас катта инсондек муомала қилиш уларнинг фикрини тенгма-тенг тинглаб бориш баробарида ўқишдан изланишдан чарчамайдиган Дилфуза опанининг меҳнатлари, туман ҳокимлиги ва туман мактабгача ва мактаб таълими бўлими томонидан бир неча бор эътироф этилган. Асли рағбат учун эмас, касбини, болажонларни, севгани учун шу соҳани танлаган суҳбатдошимиз, шарафли касби ортидан 2 нафар фарзандини вояга етказди, уларни элга қўшди. 
    Туманда боғча ёшидаги фарзандларимизни келгусида ҳам ақлий, жисмоний ва руҳий соғлом бўлишида жон куйдириб меҳнат қилаётган мактабгача таълим тизимининг фидойилари қаторида Дилфуза опага ҳам куч-ғайрат тилаб қоламиз.